2- إيه هي المعلوماتيه الطبيه؟

Credit: Needpix.

نبتدي سلسلة البوستات اننا نعرف يعني إيه معلوماتيه؟ بالأخص إيه هي المعلوماتيه الطبيه؟ بس قبل ما ابدأ, حابب أنوه ان البعض لفت انتباهي ان سلسلة الفيديوهات اللي حطيتها في البوست السابق لهاني صقر ليها متابعه أحدث بتواجه مشكلتي الرئيسيه مع الأجزاء القديمه من سلسلة الفيديوهات و هي انها بتبين الدنيا أسهل بكتير من الواقع و بتدي انطباع غير واقعي. الأجزاء الجديده واقعيه أكتر بكتير و متماشيه جدا مع اللي بشوفه هنا كل يوم و اللي كنت بشوفه حتى قبل ما ابقى طالب دكتوراه, أيام ما كنت في منحة اليابان. لينكات الفيديوهات هتلاقوها في اخر البوست, بالذات أول اتنين هيفيدوكم. 

طيب, نرجع لموضوعنا الرئيسي. 

المعلوميات الطبيه, أو ال

Biomedical informatics

هي مجال بيجمع ما بين الطب و البيولوجيا ,و علوم الحاسب , و الرياضيات. يعني إيه الكلام ده؟ يعني اللي شغال في المجال دي بيسأل أسئله زي:

1- Genomics, transcriptomics, proteomics ...

إيه الجينات أو التغيرات الفوق جينيه المسؤوله عن المرض الفلاني؟ طبعا الناس اللي بيعملوا أحداث معميله أو

wet lab research

بيسألوا نفس السؤال, بس طريقة الإجابه مختلفه. الناس اللي شغاله في مجال المعلوميات عندهم الداتا بالفعل, يعني مش محتاج تروح تعمل فار ناقصه الجين الفلاني أو الجين العلاني و هل هيجيله المرض لو زودنا انتاج البروتين المعين ده. مش محتاج تعمل كل ده, لأن بالفعل فيه داتا كتير موجوده سواء كنيجة التجارب المعمليه أو نتيجة تحليل العينات الطبيه و ال

genome sequencing

و غيره. بمعنى اخر, احنا في عصر الداتا اللي موجوده أكتر بكتييير من قدرتنا على اننا نحللها في قعدة عرب زي ما كان بيحصل زمان. انما اللي بيحصل دلوقتي ان الناس بتعمل التجارب و التحاليل و بتنشر النتايج ببلاش لأي حد يشتغل عليها و يحللها. لو عايز تعرف أكتر دول على جوجل على:

big data أو open data

2- Clinical decision support, healthcare information management

ازاي نساعد الطبيب في اتخاذ القرار الطبي؟ هل ممكن نعمل سوفت وير يشخص الحاله بناء على المعطيات و التاريخ المرضي إلخ؟ ازاي نستغل الكمبيوتر و المعلوميات اننها تنغلب على العامل البشري زي ان الدكتور يشخص الحالة بناء على انطباع أولاني مسبق غير مبني على أسس إحصائية زي نسبة المرض في البلد دي أو الشعب ده. إيه أحسن طريقه نخزن بيها المعلومات الطبيه بحيث انها تكون سهلة المنال و البحث للباحثين و الدكاتره و سهلة النقل من مستشفى للتانيه؟ ازاي نتعامل مع قضايا الخصوصيه في المعلومات الطبيه؟ 

3- Biomedical imaging informatics

و ده المجال اللي المعمل اللي أنا فه حاليا مركز عليه. ازاي نستخدم الكمبيوتر اننا نعرف اذا فيه ورم في المخ أو الكبد أو الرئه, على سبيل المثال, في الإكس راي أو السي تي أو الرنين المغناطيسي؟ هل ممكن اننا نقرا الأشعه بشكل أوتوماتيكي و موضوعي باستخدام الكمبيوتر؟ هل ممكن اننا نطبق نسخ معدله من اللوغاريتمات الي بيستعملها الفيس بوك انه يتعرف على الوشوش اننها نساعد الأطباء النفسيين انهم يعرفوا المرضي بتوعهم بيحسوا إيه أو بيمروا بإيه؟ هل ممكن نستغل الأبحاث الموجوده في تحليل صور الأقمار الصناعيه, على سبيل المثال لا الحصر, اننا نعالج صور الباثولوجي و نستخرج منها نوع الورم و مدي حميديته أو خبثه بطريقه أحسن من (أو على الأقل مكمله ل) دكاترة الباثولوجي المتخصصين؟

و للحديث بقيه في البوست الجاي ان شاء الله