 |
| Credit: Wikimedia Commons. |
نكمل كلامنا بالسؤال المنطقي اللي بتسأله لما بحكي لحد على اختياري أو بحاول أقنعهم يسلكوا نفس السكه: يا عم انت دكتور إيه دخلك بالكوبيوتر و البرمجه؟ مش حرام السبع سنين خدمه في كلية طب يضيعوا هدر؟ الإجابه ليها نواحي كتير, مثلا:
1- الفضول العلمي: في البوست اللي فات ذكرت بعض الأسئله اللي بيحاول الباحثين في المجال ده انهم يجاوبوها. بالمناسبه أنا حابب أأكد على كلمة "بعض" لأن بالفعل و من غير مبالغه فيه عدد لا متناهي من الأسئله اللي ممكن تتسأل. أنا عارف ان فيه نسبه (كبيره) من طلبة و خريجي كلية الطب كان طموحهم يدخلوا علوم أو هندسه و دخلوا استخسار مجموع أو ضغط مجتمع أو غيره. الطريق اللي أنا هوصفه في مجموعة البوستات دي طريقه لا بأس بها ان الواحد يمشي في حاجه حاببها و يجمع ما بين الطب اللي درسه و المجالات الرياضيه و العلميه. ده الدافع الأساسي و شبه الوحيد اللي خلاني أدخل المجال ده, بقية العوامل تعتبر مزايا أكتر منها دوافع, بس دي حاجه تختلف من شخص للتاني.
2- طريقه لدخول الولايات المتحده: عدد متزايد من خريجي كليات الطب بدأ يعرف ان فيه طريقتين رئيسيتين لدخول الولايات المتحده بشكل قانوني: طريق النيابه الطبي و طريق الدكتوراه البحثي. طريق النيابه ليه مزاياه و ليه عيوبه, و هنا هركز على عيبه الرئيسي و هو غلوه و التنافسيه الشديده. طريق الدكتوره أرخص (بس بيحتاج نفس المجهود بتاع طريق النيابه), رغم ان المنافسه فيه تعتبر مش أقل كتير من المنافسه على النيابه. بالمناسبه, لو انت نشرت أبحاث كتير و ليها تأثير لا بأس به ممكن بعد فتره انك تقدم على الجرين كارد بشكل قانوني. مش بس كده, الجرين كارد في الحاله دي بيطلع بسرعه (في ظرف شهور معدوده) على أساس ان من مصلحة الولايات المتحده انها تحتفظ بيك كباحث ليك تأثير في المجتمع. طبعا كل الكلام ده بيكون بالمتابعه مع محامي و مش دايما مضمون و فيه تفاصيل كتير للموضوع مش ده مكان نقاشها.
3- السبع سنين خدمه في كليه الطب ما راحوش هدر و لا حاجه. كونك طبيب, ده بيديلك ميزه في كل حاجه, بالذات في موضوع انك تلاقي حد يمول أبحاثك, و دي حاجه مش سهله و غاية في الأهمية. هنا الطبيب بيعتبره عنده الخبره الكافيه انه يعرف ايه الأسئلة الطبيه الكويسه اللي ممكن تتسأل و يكون لها تأثير على العنايه الإكلينيكيه بالمرضى, حتى لو كل الطرق البحثيه عباره عن شغل على فئران تجارب أو حتى شغل برمجيات. لو مهتم تعرف أكتر عن موضوع مشاركة طلبة و خريجي الطب في الأبحاث, اقرا المقال البحثي اللي نشرناه مؤخرا عن الموضوع ده بالتحديد
4- طيب ايه ميزة انك تدخل مجال البرمجيات عن المجالات البحثيه البيولوجيه, زي أبحاث الخلايا الجذعية أو البيولوجيا الجزيئيه؟ كذا حاجه. أولا, ده بيتيح ليك انك تشبع فضولك من الناحية الرياضيه أو البرمجيه لو انت من هواة البرمجه أو نفسك تتعلم البرمجه. ثانيا, لو انت من الناس اللي ما عندهاش صبر و ما بتحبش تقعد أسبوع كامل في التجربه و عايز نتايج سريعه فالمعلوميات هي المجال الأفضل بالنسبه لك. ثالثا, و دي نقطه مهمه جدا جدا جدا, فيه عدد أكتر بكتيييير من اللي السوق محتاجه من حاملي الدكتوراه في مجال البيولوجيا التجريبيه. بمعنى أخر, انك تلاقي شغل في المجال البحثي و انت معاك دكتوراه في الأبحاث البيولوجيه المعمليه ده أصعب من لو معاك دكتوراه أو ماجيستير في مجال المعلوميات, خصوصا الجينوميكس. و لو طموحك كبير و نفسك تبقى أستاذ جامعي, فرصك أكتر لوفي مجال البرمجيات عن الأبحاث المعمليه البيولوجيه (و في سن أصغر كمان).
هل الكلام الحلو ده كله معناه ان ما فيش عيوب؟ لأ طبعا. فلوسك في النيابه أكتر من فلوسك كطالب دكتوراه, رغم انك بعد التخرج لو اشتغلت مع شركات كويسه مرتبك مش بيفرق كتير عن مرتب الطبيب الباطني هنا. بالإضافه لده, المجال مختلف و محتاج منك مجهود إضافي و حبة تعب حلوين عشان تثبت نفسك.
نكمل كلامنا في البوست الجاي بقى ان شاء الله
Comments
Post a Comment